Boddi

Cadi Dafydd
Tu hwnt i’r môr mae llinell ddiderfyn,
Pinc y gorwel yn gwaedu i’r dyfroedd,
Dagrau hallt yn gymysg efo’r ewyn,
Minnau’n dyheu am deimlo’i thymhestloedd.
Chwytha gwynt y gwyll i gyfeiriad y tir
A’m fferru, methaf â symud un cam.
Dim ond taro tonnau yn y cefndir
A lliwiau’r machlud yn eirias wenfflam.
Er gwaetha’r fferru, af tua’r tonnau,
Caf gysur o gosi’r llanw ar fy nhraed
A’i deimlo’n crafu fy asennau,
Mynnaf fynd ymhellach, iddo halltu fy ngwaed.
O’r dim byd hwnnw, dychwelaf yn ôl
I’r traeth gwag a hynt ei wynt gogleisiol.