Sul y Cofio

Sulwen Richards
Gwisg dy babi coch yn falch ar dy frest
Canran fechan o'r cochni ar lawr.
 
Heidia ar yr awr, dangosa dy barch
Dan guddfan dy got fawr a’th ymbarél
Rhag trawiad y gwynt a’r glaw,
Clyw’r tangnefedd ffrwydrol.
 
Cyfnewid sgrechfeydd hiraethus
Am dy fywyd moethus;
Cyfraniad ugain ceiniog,
A chadw i gerdded.
 
Cerdded. Coesau. Colled.
Eu haberth nhw,
Dy eiddilwch di.
 
Yn angof ni chânt fod
Canys y pabi coch
A chenhedlaeth sy’n ofni beirniadaeth
Nid rhyfel.