Eira
​​
Sabrina Fackler
Dwy ferch yn yr eira,
Chwerthin dibryder,
Diwrnodau o gemau annirnad.
'Paid â dringo, cariad! Byddi di’n crychu dy ffrog!'
 
Dwy ferch yn yr ysgol
Gwahaniaethau anweledig
Dillad rygbi cêl y tu ôl i ffrogiau rhy dynn.
'Be’ ti wedi neud gyda dy wallt? Ti’n edrych fel bachgen!'
 
Dwy ferch yn y coleg
Cusanau cudd
Croes gostus dros ddrws y cartref.
'Dal dim cariad mewn golwg? Ti mor bert, rhaid i’r bechgyn sefyll mewn rhes!'
 
Dwy fenyw o flaen yr allor
O’r diwedd
Eglwys lawn o ffrindiau, ac aelod neu ddau o deulu.
Sylwadau o dan y lluniau gyda #friendshipgoals
'Hyfryd! Oes llun o’r priodfeibion hefyd?'

Dwy ferch yn yr eira,
Gemau cyfeillesau
Dan lygaid barcud eu mamau.
'A gofi’r diwrnod pan gwrddon ni?'
'Ydw. Wnest ti stwffio eira i lawr fy nghrys.'