Coelcerth

​Marged Tudur
​Maneg am faneg, dônt gan grensian
eu chwerthin yn gamau mân,
dônt yn fintai o fochau cochion
ac ymgasglu ger y tân
 
i weld rocedi’n ffrwydro’n frychni
a chwalu’n deilchion dros y dref,
tra bo gewin lleuad lonydd
yn tynnu i’r byw yng nghlyw pob llef,
 
pob ymbil, pob ochenaid dawel,
pob ing sy’n creithio’r co’
a phob llaw fach sy’n sgubo’r lludw
o’n llygaid ni a’n byd ar ffo’.